মুখ্য পৃষ্ঠা
06/04/25
14:25
"আজলী সখীৰ দুখ"
নিয়ৰে ধোৱা সেমেকা দুৱৰি দলিচাত বহি
সখীয়ে নিৰলে কাৰ লগত কথা পাতে
মুৰৰ ওপৰেৰে দিনমণিয়ে বিদায় ললে
আজলী সখীয়ে গমকে নাপালে |
মাঘৰ মেঘালী চুলিত সানি
আজলী সখীয়ে চেনাইলৈ বাট চাই
বহু আবেলিৰ অপেক্ষাৰে পল গণোতে
শীতৰ বতাহে সখীক জোকাই যায় |
ফাগুন আহে লাহে লাহে
হালধীয়া পোচাক পিন্ধি
সখীৰ মন উখল মাখল
চ'ততে চেনাই আহিব বুলি |
বসন্তৰ সেউজীয়া সম্ভাৱনা বুকুতে লৈ
শ্যামলীমা পাহাৰক চেনাই বতৰা সুধে
আজলী সখীয়ে আজিও নাজানিলে
চেনাইক গুলীয়াই মাৰিলে কোনে ?
সেউজীয়া কুঁহিপাতৰো আছে দুখ
হালধীয়া হৈ সৰিব এদিন
সখীয়ে নুবুজে অপেক্ষাৰ থাকে সীমা
ফাগুন যে নাথাকে চিৰদিন |
ৰাঙলী মদাৰৰ ক্ষোভত আকাশ জ্বলে
মলয়াই গুনগুনাই ফাগুনৰ গান
সখীৰ দুগালেৰে চকুলোৰ ঢ়ল নামে
ফাগুনে নিদিলে চেনাইৰ সন্ধান |
© ৰাজু কলিতা
16/11/14
